Досегашниот министер за Внатрешни работи, Панче Тошковски, и официјално си замина од Министерството за Внатрешни работи. Тошковски кој беше технички министер во Владата, фотелјата му ја отстапи на неговиот заменик Назим Буши кој функцијата ќе ја извршува до формирањето на новата влада.
Тошковски им се заблагодари на соработниците и додаде дека изминатиот период иако му бил исполнет со многу предизвици сепак успеале да ги организираат најдемократските избори досега.
„Заедно со мојот тим покажавме дека со макотрпна работа, професионализам и чесност може да се постигне многу за нашата држава. Успеавме да обезбедиме стабилност и доверба во изборниот процес, односно слободно можам да кажам дека ги организиравме најдемократските избори досега, што впрочем беше и нашата главна цел“, рече Тошковски.
Покрај тоа, додаде дека вложивле напори за подобрување на безбедноста и редот во нашата земја, справувајќи се со повеќе предизвици и ситуации кои бараа брзи и ефикасни реакции. Посочува дека со гордост може да каже дека како тим кој раководеше со Министерството во овие четири месеци, функциониравле транспарентно и одговорно, секогаш со целосна посветеност на потребите на граѓаните и државата.
„Со гордост можам да кажам дека како тим кој раководеше со Министерството во овие четири месеци, функциониравме транспарентно и одговорно, секогаш со целосна посветеност на потребите на граѓаните. Потребни се итни и темелни реформи кои се неопходни за Македонија што поскоро да се стабилизира и да го продолжи својот раст и развој“, додаде Тошковски.
Тошковски посочи дека постакува што поскоро да се формира новата влада за да можат државните институции да профункционираат со целосен капацитет. Му се заблагодари на неговиот тим кој, како што вели, вложил натчовечки напори во изминатите четири месеци, но и на сите вработени во Министерството за внатрешни работи кои навистина биле на висина на задачата.
Љубиша Владимиров
