Министерот за внатрешни работи, Панче Тошковски денеска информираше дека екс-директорот на ЕСМ, Васко Ковачевски не е достапен за домашните органи на прогон. Истакна дека полицијата ќе стори се во рамките на надлежности, со цел Ковачевски да биде изведен пред лицето на правдата.
-Вчера имаше многу шпекулации во однос на вашето прашање и каде се наоѓа или дали се откажал од македонското државјанство. Посоченото лице е во рамки на регистарот на државјани на Македонија и е македонски државјанин. Не побарало отпуст, согласно информациите кои што ги имам. Не би сакал да шпекулирам (околу неговата моментална локација, рече Тошковски во изјава за медиумите.
Првиот полицаец во државата упати благодарност до останатите полицајци од МВР за спроведената акција која придонесе до приведување на 23 лица поради сомнеж за сторен криминал од 6,5 милиони евра во ЕСМ, РЕК „Битола“, ТЕЦ Осломеј и ТЕЦ Неготино.
-Јас искрено не би застанал на првичната вредност, односно постојат сомненија дека она што е набавувано во вредност на злато, а не е употребено, тие 5% кога било употребено предизвикало дополнителна штета на блоковите. Доколку се докаже дека е сторена дополнителна штета, таа ќе треба некој да ја плати. Некој ќе треба да ја плати и предизвиканата штета во енергетскиот сектор, кажа Тошковски.
При извршени претреси во Битола, Неготино, Кичево, Велес и Скопје за време на акцијата обезбедени се голем број материјални докази, а кај три лица пронајдени и одземени се околу 130.000 евра.
Дел од осомничените во својство на службени лица во АД ЕСМ и АД „Пошта на Северна Македонија“ создале група која имала за цел вршење на кривични дела Злоупотреба на постапката за јавен повик, доделување на договор за јавна набавка или јавно – приватно партнерство, Злоупотреба на службена положба и овластување и Перење пари.
