Заедничкиот граничен премин меѓу Македонија и Србија и борбата со нелегалната миграција. Ова се главните теми на кои во Куманово разговараа министрите за внатрешни работи од двете земји, Панче Тошковски и Ивица Дачиќ. Иако договорот за заеднички премин кој беше птпишан во 2019 година, а со кој требаше да се намали огормниот метеж кој го има на Табановце, ни по пет години не е реализиран. Тошковски вели вината треба да се бара кај нас, бидејќи Србија завршила се, а ние со години не сме направиле ништо. Планот е од следната летна сезона конечно да биде во функција.
-Јас како и секогаш ќе бидам малце брутално искрен, кај нас е кабаетот, како и за се друго, како што е кај на нас кабаетот што не го воспоставиле „one stop shop“ системот со Република Албанија, Косово и со Република Србија, кабаетот е во Македонија, заради тоа што и во овој случај имаме потпишано договор 2019-та година. Србија е спремна во целост и со техничко решение и со се, а ние сме си спиеле како што во минативе години е добро познато како факт за преземање на дејствија од македонската страна, изјави Тошковски.
Нелегалната миграција е еден од најголемите проблеми со кои се справуваат и Србија и Македонија, кои се на рутата на мигрантите до големите европски земји. Според двајцата министри на ова поле мора да има помош од Европската Унија, бидејќи и во двете држави тие доаѓаат од членки на ЕУ, Бугарија и Грција.
-Оваа година спречивме околу 7.000 нелегални преминувања на нашата граница. Работевме многу да го намалиме бројот на нелегални преминувања. Добивме пофалби за тоа Европската комисија и Европската Унија. Но и Македонија и Србија го имаат тој проблем, а тоа е дека мигрантите ни доаѓаат од Европската Унија, изјави Дачиќ.
На сребата се разговарало за повеќе теми, а и двајцата министри се едногласни дека соработката меѓу македонската и српската полиција е одлична. Најавија нејзино продлабочување со повеќе оперативни соработки.
Матеја Петровски