Судски совет ќе утврдува одговорност кај судијата Пајазит Пајазити во врска со куќниот притвор на поранешниот командант на УЧК, Блерим Рамадани кој избега на Косово, потврдуваат за Алфа информации оттаму.
На вчерашната седница советот ја прифатил иницијативата на членот Александар Камбовски кој ја предводеше комисијата за одговорност на судијата Пајазити. Во нареден период следи расправа на советот на која одбрана ќе изнесе судијата и ќе одговори на кои сменети околности се повикал кога му дозволил на Рамадани притворот да го издржува кај куќни пријатели.
Месеци наназад бегството на Рамадани предизвикува бура од реакции кај експертската јавност, но и политички препукувања. По бегството на командантот на УЧК, ВМДО ДПМНЕ побара Пајазит Пајазити да биде разрешен веднаш бидејќи според нив тој е експонент на СДСМ и ДУИ во судството, кој го руши системот од внатре. СДСМ, пак, обвинуваа дека полицијата е виновна зошто не го чувала Рамадани во куќата на неговите пријатели. Исто така со вакви обвинувања излезе и Кривичниот суд кој во соопштение потенцираше дека одговорноста за бегството не е кај судијата, туку кај надлежните што го вршат надзорот.
Министерот за правда Игор Филков изјави дека одлуката на Пајазити не е разбирлива и се коси со досегашната пракса.
Покрај Пајазити, уште тројца судии од Кривичен суд донесоа незаконита одлука за неопределување екстрадиција на Рамадани. Врховен суд ова им го преточи во одлука во која наведе повторно да се преиспита екстрадицијата.
Додека македонските судови решава дали тој треба да им се предаде на српските власти, Рамадани си ги спакува куферите и побегна.
Тој беше уапсен летоска на граничниот премин Јажинце и однесен на 30 дена екстрадиционен притвор во затворот во Шутка по меѓународна потерница на Србија. Осомничен е дека како поранешен војник на УЧК, извршил воени злосторства.
На 1 август, мерката на Рамадани, Пајазити му ја преиначи од притвор во куќен притвор. Тој требаше да остане кај пријателите дома до 16 август. Додека обвинителство подготвуваше жалба за одлуката на Пајазити, Рамадани веќе ги отпакуваше куферите на Косово.
