Судскиот совет наместо да утврдува ланец на одговорност за бегството на поранешниот командант на УКЧ Блерим Рамадани, тој на седница само ја констатираше фактичката состојба за одлуката на судијата Пајазит Пајазити, коментира дел од правната фела.
Прво ефективен, па домашен притвор за Рамадани одлучил судијата Пајазити без да наведе кои се сменетите околности, констатира Судскиот совет на последната седница без да ја соопшти одлуката за евентуалната одговорност на судијата.
За одлуката на Врховниот суд за повторно одлучување за екстрадацијата на Рамадани, според адвокатот Димитар Савовски, тоа не е ништо друго, освен „по свадба тапани“, со оглед на тоа што Рамадани побегна.
На седницата на Судски освен што не се дискутираше за постапувањето за Пајазити, Судскиот совет избра да ја игнорира и контроверзната одлука на тројцата судии, колеги на Пајазити од Кривичен за екстрадацијата на Рамадани. Според Врховен, тие донеле незаконита одлука за неопределување екстрадиција во истиот случај. Врховните судии им напишале на нивните колеги да се преиспитаат што донеле и да донесат „законита одлука“.
Случајот Рамадани предизвика бура од реакции и политички препукувања не само кај домашната јавност туку и во регионот. За неговото бегство, СДСМ и ВМРО ДПМНЕ меѓусебно се обвинуваа, досека официјален Белград побара објаснување од државните органи како е можно некој кој е во домашен притвор баран со меѓународна потерница да побегне.
Рамадани врз основа на меѓународната потерница издадена до Интерпол од Србија, беше уапсен на 17 јули 2024 година на граничниот премин Јажинце и однесен на 30 дена екстрадиционен притвор во затворот во Шутка. Содржината на налогот за апсење се заснова на сомневањата на Србија дека Рамадани, како поранешен војник на УЧК, извршил воени злосторства во регионот на Неродиме.
На 1 август, мерката на Рамадани од Кривичниот суд му беше преиначена од „притвор“ во „куќен притвор“ и тој, според решението, беше упатен на адреса во Скопје.
Со оваа одлука се предвидуваше тој да остане во „куќен притвор“ до 16 август, но ден претходно судот достави документација до МВР за распишување на централна потерница бидејќи тој веќе не беше достапен на органите на прогонот.
