Претседателот на Кривичниот суд во понеделникот итно направил друг распоред за судиите на претходна постапка и го тргнал најизвиканиот судија Пајазит Пајазити да не одлучува за притворите на криминалната група Барон и случајот со Државна лотарија, за Алфа брифираат извори од судот.
На првичниот распоред, за тековната недела требало да дежура судијата Пајазити, но со новото прераспоредување, дежурал судијата Васил Диневски.
Нејасно е дали овој потег значи спас за судијата од закани и притисоци од Барон мафијата, или спречување на евентуално политичко влијание, со оглед на тоа што Пајазити е поврзан со неколку звучни и контроверзни случаи.
Покрај овие две истраги во истиот ден од Обвинителство е доставен и предлог притвор за тепачка што се случила во Градскиот парк, па судијата Диневски турбо работел на три случаи.
На прашање на Алфа дали претседателот на судот, Иван Џолев итно направил нов распоред, од Кривичниот суд појаснуваат дека случајот Лотарија бил доставен во понеделникот по 22 часот, и го презел дежурен судија. Но нема појаснување дали е направен нов распоред.
Заради тоа и невозможно е предлогот, претходно, да бил распределен кај друг судија, па да се даде на дежурниот и истото може да се провери и со надлежното Обвинителство, велат од Кривичен суд.
Судијата Пајазит Пајазити го пушти во домашен притвор поранешен војник на УЧК Блерим Рамадани. Тој избега на Косово истиот ден кога судот му ја укина одлуката за куќен притвор. Неговата вмешаност во екстрадицијата и куќниот притвор на Рамадани го привлече вниманието за неговите судски одлуки низ годините. Судскиот совет се уште не одлучил дали Пајазити ќе биде разрешен поради бегството на Рамадани. ж
Имено, Пајазити не определи притвор ни за осомничените насилници во Македонска навигација иако имаше предлог за притвор од Обвинителство. Тој го спаси од затвор и Иџет Мемети, членот на Советот на обвинители кој призна дека земал мито. Пајазити ја прифати спогодбата што ја направил митаџијата Мемети во Обвинителство и го осуди со условна казна. Исто така, прифати и тригодишна казна за врховниот судија Наќе Георгиев кој заедно со Мемети се осудени за земање поткуп од 10. 000 евра.
Судијата Пајазит Пајазити е заменик претседател на Кривичниот суд.