Максимална 12 годишна затворска казна доби Стојанче Јовановски зошто и ја загрозил сигурноста на сопругата и нанел телесни повреди и ја навел на самоубиство. Кривичниот суд во Скопје го осуди на 5 години за тепањето, 3 години за загрозување на сигурноста и уште 5 години за наведување на самоубиство, но согласно Законот за одмерување казни, изречена му е единствена казна затвор од 12 години. Јовановски мирно без да се помрдне и изусти ниту збор во празната судница во која немаше никој од неговото и семејство на сопругата, ја слушна пресудата.
Обвинителката Адела Бојчевиќ и адвокатката на оштетените Неда Чаловска Димовска се задоволни од одлуката на судот. Според нив, оваа осуда испраќа силна порака до јавноста, дека семејното насилство во иднина нема да се толерира
„Во оваа фаза од постапката имајќи го предвид фактот дека станува збор за првостепена пресуда којашто не е правосилна, и која верувам дека одбраната ќе ја обжали, Судот ја изрече максималната казна затвор за сите три кривични дела“,рече Бојчевиќ.
„Сметам дека ова е голем чекор што во иднина треба да се следи заради тоа што во случаи на самоубиство понатаму државните институции треба да истражуваат дали било поради долготрајно семејно насилство како што беше во овој случај“, рече Чаловска.
Според пресудата, на 2 март, од 11 до 12:20 часот, на повеќе локации, обвинетиот со умисла вршел семејно насилство и физички ја нападнал својата сопруга Ивана, нанесувајќи ѝ телесни повреди. Насилството продолжило и во периодот од 12:45 до 13:35 часот, кога упатувал сериозни закани по нејзиниот живот, предизвикувајќи кај неа силно чувство на страв, несигурност и вознемиреност. Заканите следувале откако заедно со сведокот Мартин Саздов, заминале до училиштето „Песталоци“ за да ја земат нивната ќерка Катја и се упатиле кон својот домот.
Во текот на судската постапка било утврдено дека обвинетиот последните три години, на повеќе локации во Скопје и во нивниот дом, континуирано се однесувал сурово, насилно и нечовечно кон оштетената, која била материјално зависна од него.
Судот утврдил дека долготрајното психичко и физичко насилство кај оштетената предизвикало тешка психичка состојба, чувство на безизлезност и целосна емоционална исцрпеност. Како директна последица на таквата состојба, таа го одзела сопствениот живот, скокајќи од тераса заедно со нивната шестгодишна ќерка.
