Започнува реконструкцијата на тврдината Исар, еден од најзначајните археолошки локалитети во Штип. Во тек е тендерската постапка, за избор на фирма, која ќе изврши реконструкција на Акрополот изграден во вториот век, од нашата ера. Проектот е на штипскиот Музеј, а Општина Штип, обезбеди околу 1,6милиони евра преку вториот владин повик за искористување на средства од унгарскиот кредит. Проектот треба да биде завршен до крајот на годината
„Пријавени се две компании, очекувам деновиве да се направи избор за најповолен понудувач и во месеците што следуваат да се започне со конзервација, реставрација на тврдината Исар, која многумина ја посакува ат како финален проект„ изјави градоначалникот на Штип, Иван Јорданов.
Тврдината ќе се реставрира според примерот на скопското Кале и Самоиловата тврдина во Охрид. На самиот врв ќе се реставрираат трите кули, кои меѓу себе ќе бидат поврзани со бедем висок 4метри. За автентичноста на реставрацискиот процес ќе се грижи штипскиот Завод-Музеј. Просторот ќе биде осветлен и ќе се изградат дополнителни скали и патека до врвот, од каде градот се гледа како на дланка.
„Предвидува изградба на три кули, конзервација и реставрација на ѕидините, целосно осветлување. Пактично тоа е давање на акцент на историското културно наследство кое како град го имаме, а досега никогаш не било акцентирано и не му било дадено значење. Верувам дека ова место ќе биде посетувано, не само од штипјани„ изјави Јорданов.
Освен што тврдината е културно-историско наследство, обичај поврзан со неа е внесен на листата на нематрејални богатства на УНЕСКО. Традиционално, секоја година , на денот на пролетта , 22март, штипјани се искачуваат на тврдината, каде според обичајот Четр”се, се фрлат 39каменчиња, додека четириесеттото се задржува за себе. Се верува дека ако тоа камче се стави под перница, ќе се сонува идниот сопругот.
