Средношколците од СОУ „Ѓорче Петров” во Крива Паланка се претставија пред пошироката јавност со одлична изведба на култната драма „Диво месо” од Горан Стефановски, подготвена по повод патронатот на училиштето.
Драмата ја режираа професорките по македонски јазик и литература, Жаклина Цветковска и Елена Трајчевска, а премиерната изведба наиде на голем интерес кај публиката и позитивни критики за младите, талентирани ученици, кои повторно ја етаблираа и реактуализираа темата на неприкосновениот македонски драматург, Стефановски, распаѓањето на едно предвоено македонско семејство.
Учениците од драмската секција ја пренесоа идејата што е круцијална, значењето на семејството, на потеклото, на домот и на татковината, а настанот помина во одлична атмосфера, во која доминираа младешката енергија и талент.
Одбележувањето на патрониот празник на СОУ „Ѓорче Петров” во Крива Паланка годинава се реализираше со богата и разновидна програма: квиз на знаења, презентација на проекти и ден на кариера, на кој матуранти од повеќе општини презентираа инспиративни идеи, се претставија факултети што отвораат врати за матурантите и компании што бараат таленти, додека учениците од здравствената струка вчера организираа бесплатно мерење шеќер во крв и крвен притисок во градскиот парк во Крива Паланка.
Програмата беше заокружена денеска со рецитал од учениците, спортски ден и доделување награди на најуспешните.
