Од утре започнува новата учебна година, а министерката за образование Весна Јаневска им посака среќен почеток и успех во стартот на сите ученици со значително подобрување на условите за настава во училиштата. зголемен број образовни асистенти во основното, но и за прв пат во средното образование, како и за учениците со посебни потреби. За прв пат е воведено и формално образование за децата на долготрајно болничко лекување.
“Значително се подигнува и инклузивноста на образовниот систем. Освен 1346 образовни асистенти во основните училишта, за прв пат, образовна асистенција ќе добијат и средношколците со посебни образовни потреби, а нив ќе им помагаат 130 образовни асистенти. За прв пат е воведено и формално образование за децата на долготрајно болничко лекување и тие повеќе нема да губат настава. Зависно од нивната состојба ќе можат да се вклучуваат онлајн во својот клас или пак, наставникот индивидуално ќе работи со нив.”- изјави министерката Весна Јаневска.
Како што веќе беше најавено од страна на министерството, учениците конечно ќе стартуваат со нови учебници по сите предмети, дури и по странските јазици што се очекува да бидат доставени до сите училишта до крајот на првата недела од училишната година. Започнува и примената на вештачката интелегенција во наставните програми.
Министерката најави и покачување на платите на наставниците.
„Верувам во квалитетите на наставниците и очекувам мотивирани да ја започнат новата учебна година, во која секако, ќе имаат и ново зголемување на платите, онака како што се договоривме пред 1 година, од 7,5% до 10% во зависност од степенот на инфлацијата, за да имаме реален раст без манипулации како што тоа го правеа претходните структури“, додаде Јаневска.
Со новите промени во образовниот систем според министерката оваа година се очекува да биде поуспешна и да се постигнат високи ресултати. Според досега доставените податоци од општините, учебната година ја започнуваат 245 илјади ученици, односно 177.800 основци и 67.200 средношколци.
