Со лисици влезе во суд, со лисици замина во Шутка. Поранешниот директор на ЕСМ Васко Стефанов и уште седум осомничени за криминал вреден 6 и пол милиони евра добија 30 дена притвор, за еден е определен куќен притвор, за 13 мерки на претпазливост. Се сомничат за злоупотреби при јавни набавки и перење пари.
За органите на прогонот се уште недостапен е поранешниот директор на ЕСМ, Васко Ковачески. Од Обвинителството соопштија дека тој во моментов е последно осмничен за овој случај, не се терети дека учествувал во организиран криминал. Ковачески е во бегство, според неофицијални информации во главниот град на Австрија, Виена. Во отсуство, судот за него определи мерки на претпазливост.
-Надлежниот Јавен обвинител достави предлог за определување мерки за претпазливост, односно Одземање на патна исправа, Обврска повремено да се јавува во судот и Забрана за одржување и воспоставување контакти, за кои судот дополнително ќе одлучува откако истиот ќе биде обезбеден од органите на прогон. Јавноста треба да биде запознаена дека согласно Законските одредби судија на претходна постапка не може да определи построги мерки за обезбедување присуство од мерките кои ги предлага Јавниот обвинител, соопштија од Кривичен.
Во случајот со кодно име „адитив“ 23-ца се сомничат дека создале група која во период од април 2023-та до август годинава, правела кривични дела Злоупотреба на постапката за јавен повик, доделување на договор за јавна набавка или јавно – приватно партнерство, Злоупотреба на службена положба и овластување и Перење пари и други приноси од казниво дело.
Матеја Петровски
