И по речиси три месеци од мистериозната смрт на новороденчето кое здраво-право се роди во прилепската Болница, а по една недела почина од сепса на Детската клиника во Скопје, истрагата си тапка во место. Несреќната мајка Лиле Петровиќ, се’ уште скршена од болка и тага по својата трета рожба, вели се’ помалку има надеж дека некогаш ќе ја дознае вистината за смртта на своето синче. Таа се сомнева дека и нејзиниот случај „ќе го покрие земјата“, како и многу други претходно.
„Ништо нема. Јас сега брзо, пред една недела бев и ми рекоа дека трае процедурата и ништо друго не ни одговорија. Јас прашав колку, ни рече дека ќе потрае. Мислам дека ќе го покријат случајот. Нема ништо, тоа е. Чекаме, сите ни ги затвораат вратите. Што можеме против нив, тие се власт, исто како со државата да се бориш“, – разочарано ни рече во телефонскиот разговор мајката Лиле Петровиќ.
Од ОЈО Прилеп не даваат конкретен одговор до каде е постапката и кога може да се очекува разврската. Оттаму само штуро ни кажаа.
- „Медицинската документација е прибавена и се работи на случајот. Тоа е обемна процедура за која ќе биде потребно време. Во оваа фаза не можеме да кажеме и дали ќе има основи и за нечие кривично гонење“, – кратко ни одговори јавниот обвинител, Стевчо Биноски.
Во исто време, нерешен останува и случајот со битолското новороденче кое почина во април минатата година по само два часа од породувањето. Но, во тој случај чекор напред е направен во октомври кога дури по шест месеци од смртта, Судска медицина резултатите од вештачењето ги испрати во ОЈО Битола. За тоа до каде е овој случај, прашавме во републичкото ОЈО.
- „Предметот е во фаза на прибирање докази. Вештиот наод од Институтот за судска медицина е доставен до ОЈО Битола. Одбарната достави свои забелешки на вештачењето, по што, јавниот обвинител, со цел да се даде одговори на сите прашања, испрати барање за дополнително произнесување од Институтот за судска медицина. Се очекува одговорот од Институтот по што ќе биде донесена одлука за натамошниот тек на постапката“, – се вели во писмениот одговор од републичкото ОЈО.
Инаку, веднаш по смртта на новороденчето од Прилеп, ресорниот министер Фатмир Меџити рече дека нема да дозволи со случајот во Прилеп да се оцрнат белите мантили.
Каролина Дурло
