Искрени желби, прегратки, здравица за подобра и поуспешна година… Поклопувањето на стрелките на часовникот го означи почетокот на 2025. Со прослава на плоштадот во Кисела Вода, граѓаните го дочекаа први јануари. И годинава градоначалникот Орце Ѓорѓиевски организираше музичка програма за најлудата ноќ пред платото на сала Расадник.
„Еден од поубавите дочеци на Новата година се случи тука во Кисела Вода, каде публиката ја забавуваа Игор Џамбазов, Влатко Лозановски, Куку Леле и Врчак“.
На некои 2024 им донесе радост и среќа, други пак посакуваат да ги заборават лошите спомени… со надеж дека новата година ќе им донесе поубави, како и многу здравје, среќа и бериќет.
„Воглавно работев многу, работев и за други и за себе. Се обидував да си го чувам здравјето, но следната година ветувам дека уште повеќе ќе си го чувам, оти на мои години веќе не е препорачливо да се седи на минус три и да се пее. Замрзнав. Си посакувам и на себе си и на другите веќе со години три работи, здравје, здравје и здравје“, изјави актерот и шоумен Игор Џамбазов.
За најлудата ноќ секој со своја шема. Некои во домашна атмосфера, со семејството и пријателите, а некои на забава излегоа и на плоштадот во Скопје. И покрај тоа што до последен момент беше неизвесно дали ќе има организирано прослава за Новата година, граѓаните славеа во центарот на Скопје, но во значително помал број од претходните години.
„А, Нова година се славеше и на плоштадот во Скопје каде ѓраѓаните се собраа и уживаа во музиката на Љубојна, Ареа, Нокаут, Сара Мејс и сите си посакаа многу среќа пари и успех во 2025 година“.
И покрај поскромното новогодишно украсување, дел од скопјани весели, разиграни ја почувствуваа новогодишната атмосфера.
Оние кои можеа да си дозволат малку повеќе, најлудата ноќ ја прославија во ресторани, кафулиња и хотели. Скопјани за момент заборавија на проблемите кои ја одбележаа 2024 и очекуваат дека овие 365 дена ќе бидат подобри од претходните.
Љубиша Владимиров
