Данела Арсовска да си даде оставка. Тоа е единствениот спас за Скопје и Скопјани, смета првиот човек на ЗЕЛС, Орце Ѓорѓиевски кој вели дека и скопските градоначалници се подготвени да иницираат законски измени за да се овозможи предвремена смена на раководството на Градот.
Чашата ја прели вчерашната седница на Советот на Град Скопје, на која наместо ургенто решавање на горливите сообраќајни проблеми, градоначалничката бараше набавка на 250 еко автобуси, за кои градот нема пари во буџетот.
„За Скопје спас во моментов е доколку Арсовска си поднесе неотповиклива оставка. Арсовска нема поддршка ни околу нејзините соработници, директорите на јавните претпријатија ги менува како гуми на шест месеци, знаеме дека станува збор за една личност која е компликтоман по природа и не сака да придонесе за развој на градот. Ѝ беше понудена рака од страна на Владата и министерот за локална самоуправа беше на таа средба заедно со премиерот. Ништо од тоа практично и не прифати“, рече претседателот на ЗЕЛС, Орце Ѓорѓиевски.
Ѓорѓиевски вели барањето на Арсовска да се сервисираат автобусите во ЈСП, не е доволно да се покријат потребите на патниците особено сега од септемри, кога почнува учебната година, односно со зимскиот возен ред.
Тој смета дека проблемите се таложат. Освен со јавниот превоз, проблеми има и во „Водовод и канализација“, во „Комунална хигиена“ и во „Паркови и зеленило“, односно во сите јавни претпријатија, а вината е во менаџерот.
Ѓорѓевски вели дека иако министерот за локална самоуправа Перински, укажал дека со сегашните законски решенија е невозможно да се смени Арсовска, скопските градоначалници се подготвени да ги почекаат измените во законот, а ако треба и да ги иницираат.
Министерот за локална самоуправа Златко Перински вели дека е подготвен да прифати каква било иницијатава, само да се реши состојбата.
„По барањето на ЗЕЛС, прво е правниот основ, бидејќи ингеренциите, во постоечките законски решенија, содржани во членот 22 од Законот за локална самоуправа, не можат да бидат одземени. Втората основа ни беше што тоа и како ќе биде спроведливо во пракса. Ние бараме инстант решение. Бидејќи надвор има 40 степени, а Скопје тоне во смет“, рече министерот за локална самоуправа, Златко Перински.
И додека градоначалничката се изема од одговорност, повеќе од јасно е дека на 2 септември во понеделник, градот ќе биде во потполн метеж. Учениците ќе тргнат во училиште, а многу од децата тешко дека ќе можат навреме да стигнат на првиот час со автобус.
Љубиша Владимиров
