Македонија повторно влезе во портокалова фаза, а топлотниот бран ќе продолжи и во наредните денови.
Во центарот на Скопје на некои места живата на термометарот стигна и над 40 степени, а енормно жешкото време ќе потрае до среда кога се очекува благо намалување на температурата.
Од владата брзо реагираа со носење на сет мерки за заштита на населението. Тие ќе важат до среда. Лекарите предупредуваат да се избегнува излегување на отворено во најтоплиот период од денот, од 11-17 часот, особено повозрасните луѓе и хронично болните.
Апелираат да се внесуваат повеќе течности, да се носи соодветна заштита од сонце и да се почитуваат заштитните мерки.
„Па овие три дена нашата држава е веќе во портокалова фаза навлезена, високи температури, треба да се почитуваат препораките на Министерството за здравство, односно од 11 часот до 17 часот, тој временски период да не се излегува, доколку немаат потреба граѓаните, доколку имаат потреба треба да бидат адекватно облечени, што подразбираме под тоа, значи да носат лесна памучна облека со светла облека, заштитена глава и да носат со себе вода, да се хидрираат“, вели доктор Маргарета Атанасовска Трипуновска.
И додека државата е под силен топлотен бран, секој се разладува како знае и умее. Граѓаните велат дека ги слушаат апелите на лекарите, но дневните обврскит мора да се завршат.
Од УХМР велат дека во втората половина од претстојната седмица, ќе има незначителен пад на температурата, само за степен до два. Се очекува веќе од 19 август, температурата да се движи од 33 до максимум, 38иот степен.
Љубиша Владимиров
