Според платформата „Ај-кју ер“, која го следи квалитетот на воздухот на глобално ниво, Скопје е рангирано на 7. место меѓу најзагадените градови во светот. Со индекс на загаденост од 187, воздухот во главниот град е класифициран како „нездрав“.
Прв на листата е Лахор, Пакистан, по кој следуваат Делхи, Индија, и Вухан, Кина.
Министерството за животна средина и просторно планирање извести дека во Струмица е надминат прагот на алармирање за загаденост на воздухот.
Според извештајот од Македонскиот информативен центар за животна средина, среднодневните концентрации на суспендирани честички PM10 надминале гранични вредности на неколку мерни места, меѓу кои Центар, Гази Баба, Карпош, Лисиче, Ректорат, Ѓорче Петров, Миладиновци, Битола 2, Кичево, Тетово, Гостивар, Охрид, Велес 2, Кавадарци, Куманово и Струмица.
Граѓаните се повикуваат да ги следат препораките за заштита од загаден воздух, особено оние од ранливите категории, како што се деца, постари лица и хронично болни.
