Скопјани се подготвуваат за викенд без вода. Вечерва во 22 часот ќе секнат чешмите, а кога повторно ќе протече вода низ нив, никој од градските властите не прецизира. Санацијата на главниот цевковод во Скопје ќе стартува вечерва и ќе трае додека не се отстрани дефектот.
Водоснабдувањето нема да прекине само во Чаир, Бутел, Радишани, Визбегово, Бардовци, Железара и Автокоманда висока зона. На критичната локација на терен нема ништо, освен што и натаму местото каде треба да започне интервенцијата е заградено.
Жителите на Скопје очекувано прават залихи од флаширана вода. Уште вчера имаше метеж но и празни рафтови во дел од маркетите кои постојано се надополнуваат. Од она што се знае е дека цистерни со питка вода ќе кружат, но само доколку дефектот трае повеќе од 24 часа.
