СДСМ бара декласификација на материјалите од Агенцијата за национална безбедност, премиерот Христијан Мицкоски алармира дека Обвинителството мора што поскоро да реагира за скандалот околу злоупотребите во АНБ. За прислушкувањето и следењето на политичари, вклучувајќи го и Мицкоски додека бил во опозиција, но и новинари и други личности мора да има одговорност – смета власта. Оваа тема беше главна и на денешната седница за пратенички прашања на опозицијата, во Законодавниот дом. Претседателот на СДСМ Венко Филипче повторно ги повика институциите веднаш и целосно да ги декласифицираат документите, а премиерот Мицкоски порача дека мора да има одговорност за незаконското следење.
„Сметам дека е од исклучително голем јавен интерес, оваа засега афера точно и детално да се расчисти. И во таа смисла согласно членот 21 од законот за следење, пратење на комуникациите се што се смета секој материјал кој се смета дека е злоупотреба или има криминал, практично не може да биде класифициран“, рече Венко Филипче лидерот на СДСМ.
„Нормално е како претседател на Владата да добијам извештаи од страна на тие институции од безбедносните агенции и нормално е да знам што пишува внатре, бидејќи сум носител на сертификат за највисока државна тајна“, рече претседателот на Владата, Христијан Мицкоски.
Тензична атмосфера во собранието настана и кога Европскиот фронт се обиде да провоцира околу уставното име – па му замерија на премиерот Христијан Мицкоски, зошто не користел Северна Македонија. Шефот на Владата му порача на Скендер Реџепи, кој впрочем е кандидат за градоначалник на Скопје, да се обиде да се однесува подемократски, а што се однесува до името на земјава, за него, како што рече, секогаш ќе биде Македонија.
„Премиерот, министрите, работниците, претседателот на Собранието, дозволува постојано да се прекршува уставот, употребувајќи име кое не е составен дел од Уставот. Ова е прекршување на Уставот а ние говориме за правата за уставно уредување, за законски права“, изјави Скенер Реџепи, пратеник од Европскиот Фронт.
„Не можете вие мене да ми кажувате како јас да ја нарекувам мојата земја и што да кажувам. Мојата земја јас сум кажал дека е Македонија и ќе биде Македонија. На оваа говорница и согласно Уставот можам да си кажувам она што мислам дека можам да го кажам и тоа се вика слобода на говор. Вие пледирате да бидете градски татко морате да бидете малку подемократ“, изјави Христијан Мицкоски претседател на Влада.
Меѓу останатите теми на седницата за пратенички прашања од опозицијата беа и економијата, платите, пензиите, истрагата за пожарот во Кочани. Од страна на Собранието побарано е од Владата на седниците за пратенички прашања да присуствуваат министрите за да можат да одговорат. Како што истакна претседателот на Собранието Гаши на овонеделниот брифинг со медиумите, за ова разговарал и со премиерот Христијан Мицкоски кој се согласил со барањето посочувајќи дека тој како премиер со неговото присуство на седниците дава пример дека треба да присуствуваат и министрите.
