Две помали групи на две различни локации. Трендафилов со стотина свои приврзаници ги блокираа влезовите на Законодавниот дом, со цел да извршат притисок врз пратениците да го изгласаат решението за 600 евра минималец и најмалку 6000 денари зголемување на сите останати плати. Идејата на синдикалците беше да ги спречат пратениците да наплатат патни трошоци, сепак поголемиот дел од нив беа дојдени на работните места. Првиот синдикалец обвинува дека пратениците дошле порано на работа за да одбегнат соочување со нив.
„Моите информации се дека голем број од нив станале рано утринава за да дојдат пред 9 часот, за да не се соочат со работниците на улица, затоа што се срамат од своите гласачи што одбиваат да ја зголемат работничката плата“, изјави Слободан Трендафилов, претседател на ССМ.
Дел од пратениците немаа проблем на работа да дојдат и пеш. Битката на синдикатот ја сметаат за легитимна, но имаат дилеми дали ваквите методи и динамика на притисок се соодветни на реалните состојби.
„Легитимно е синдикалното барање, тие да бараат, другата страна треба да процени. Актуелната влада се соочи со пустош во институциите, многу голем број дилеми и прашања, многу пари кои недостасуваат во институциите и тоа што треба сите да го работиме и поттикнеме во општеството е на кој начин овие пари се користени во минатото, зошто е дојдено до ваква дупка, зошто сме во ваков безизлез и кои се решенијата што ги нудиме. Како дојдовте денеска? Па, јас често одам пешки, а денеска со автобус, така што не ми е првпат“, изјави пратеничката на ВМРО-ДПМНЕ, Иванка Василевска.
Барањата на синдикалците се максималистички, но тоа не е проблем за СДСМ, кој отворено дава поддршка на нивната стратегија.
„Социјалдемократскиот сојуз и јас лично давам поддршка на Сојузот на синдикати на Македонија за зголемување на минималната плата. Денеска дојдовте пешки на работа? Да, често одам јас пешки“, изјави Оливер Спасовски, пратеник на СДСМ.
Дел од присутните синдикалци сметаат дека ваквиот притисок е единствениот начин да ги натераат пратениците да ги изгласаат нивниот законски предлог.
„Протестирам за повисока плата на наставниците… Јас сум работник, така што се однесува и на мене што зборуваат овие луѓе, што го бараат.“
Протестната блокада од пред Собранието во четврток ќе се префрли пред Коморите, а наредниот вторник и пред Владата. Трендафилов најави и собирање на 10.000 потписи, со што работниците би станале овластен предлагач и би поднеле иницијатива за намалување на платите на пратениците и функционерите.
