Пресудите на Судот во Стразбур мораат да важат за сите земји. Доколку тие не се спроведуваат, треба да се размислува и за воспоставуваање механизам на притисок, па дури и закана за исклучување од Советот на Европа. Без нивно спроведување, Судот ризикува да стане проблематична институција. Ова е ставот на претседателката Гордана Сиљановска Давкова што го порача пред претседатели на врховни судии од Централна и Источна Европа, на која имаше и претставник од Бугарија.
- „Не можам а да не потенцирам дека постојат бројни пресуди од Стразбур кои се однесуваат на заштитата на правата на македонското малцинство во соседството, а кои не се почитуваат. Тоа кај мене отвора сериозни дилеми во однос на задолжителноста на овие пресуди. Без нивно спроведување, Судот ризикува да стане проблематична институција“- рече Сиљановска – Давкова алудирајќи на македонското малцинство во Бугарија.
Македонија како држава ги почитуваме пресудите кога се однесуваат на внатрешното функционирање на нашите судови, но тоа не е пример и со сите членки кои се дел и од ЕУ, рече претседателката алудирајќи на официјална Софија. Тоа го кажала и на нејзината колешка Илијана Јотова на првата средба.
- „Ги споменав пресудите, но не поставував директно прашање дали тие ќе бидат спроведени. Наместо тоа, укажав на обврската сите членки на Советот на Европа, вклучително и оние од Европската унија, да се однесуваат одговорно кон работата на овој исклучително важен суд во Стразбур“ – порача таа.
И премирот Христијан Мицкоски минатата недела потсети на 14-те пресуди кои досега ќе има донесено Судот за човекови права во Стразбур а Бугарија ги нема спроведено. Официјална Софија иако е обрзана да дозволи регистрација на ОМО Илинден – Пирин таа одбива да ја спроведе судската одлука. Не може само за нас да важат договори и обврски, или за сите или за никој – дециден е Мицкоски.
