Жените рамноправно да учествуваат во дефинирањето на правилата, приоритетите и етичките граници, да бидат рамо до рамо со мажите како во дигиталниот свет така и во реалноста. Претседателката Гордана Сиљановска-Давкова, во својство на покровителка, ги додели наградите за иновација, лидерство и влијание во ИТ екосистемот „Women in Tech Macedonia Awards“.
Од вила Водно, беа испратени силни пораки за поддршка на жените, со посебен фокус на надминување на родовиот јаз во науката и технологијата.
„Како жена се радувам што повеќе од половина од истражувачката заедница кај нас ја сочинуваат жени. Ова укажува на сериозен интелектуален потенцијал на огромен, се уште не доволно искористен ум, знаење креација и иновација. Кога половина од популацијата нема целосен пристап, тогаш не губат само жените, тогаш слабее економијата и самиот хоризонт на иднината. Денес не е доволно жените само да бидат дел од технолошкиот развој туку е неопходно рамноправно да учествуваат во дефинирањето на правилата, приоритетите и етичките граници на дигиталниот свет.“– вели претседателката Гордана Сиљановска – Давкова.
На првите „Women in Tech Awards“ во Македонија во соработка со Министерството за дигитална трансформација, беа доделени награди во 9 категории. Од истоимената организација порачаа дека вистински напредок ќе има кога сите ќе бидат дел од промената.
„Нашата цел е да ги истакнеме претставниците на македонскиот Ит и технолошки сектор, но уште поважно да создадеме примери кои ќе ги инспирираат и сите останати генерации на млади лидери, иноватори и визионери да продолжат да го градат нашиот ИТ екосистем.“ – вели претседателката на „Women in Tech“ Македонија, Моника Ризовска.
Women in tech е една од најактивните технолошки заедници во регионот. Повеќе од 15 години работи со посветеност на поддршката и едукацијата на жените во дигиталната трансформација, помош при вработување и претприемништвото.
