Противпожарната единица-Штип во моментот е добро технички опремена и има солиден возен парк, информира командирот на Територијалната противпожарна единица (ТППЕ)-Штип, Благо Ренџов. Но, како што вели, во моментов има недостиг на пожарникари, а овој проблем годинава се решава со ангажирање на доброволци од страна на Дирекцијата за заштита и спасување.
-ДЗС од почетокот на сезоната ни донесе возила на интервентната пожарна. Располагаме со четири Пинцгауера, два БТР, нон стоп имаме лица од Дирекцијата кои дежураат овде, кои се овде 24 часа и кои навистина ни помагаат во гаснењето на огнените стихии- вели Ренџов.
Топлотниот бран го зголемува и ризикот од пожари, а во Штипскиот Регион најкритична точка и понатаму е планината Серта. Ренџов посочува дека ризични остануваат планинските предели, каде теренот најчесто е непристапен и стрмен.
– Критични места се, регионот кон општина Карбинци, планината Плачковица, од другата страна Трогерци, каде граничиме со општина Свети Николе, па следува Серта со селата Лакавица, Лесковица, Селце, Пухче. Овде имаме критични села, непристапен терен, со многу падната маса, што ни го отежнува гасењето на пожарите- изјави Ренџов.
Според Ренџов, најголем дел од пожарите се последица на човечко невнимание. Инаку во општина Штип годинава имаше пожари во планинските предели, но пожарникарите водеа битка и со огненините стихии, кои загрозуваа куќи и викендици.
