До средината на наредната година во Штип, треба да биде готов најголемиот еко парк во регионот. Паркот „Иднина„ ќе се простира на околу 70.000метри квадратни, во близина на новиот булевар и ќе ги поврзува двете населби 8ми Ноември и Баби. Освен зелени појаси, патеки,реквизити за деца, поради близина на реката Брегалница, се предвидува и изградба на мини езерце.
„Ќе го промени ликот на овој дел од градот. Знаете во минатото беше доста небезбеден, руиниран, неосветлен. Како потреба на граѓаните, решивме да инвестираме и дад ги пренаменеиме парцелите наоколу, за да создадеме развој на нашиот град„ изјави Иван Јорданов, градоначалник на Штип.
Според планот на општината, со носењето на нов урбанистички план и изградба на булеварот и паркот, овде ќе биде идниот развој на градот. Предвидено е изградба на неколку станбени и деловни објекти. Една од парцелите е веќе купена, а општината од нејзината продажба инкасираше околу еден и пол милион евра. На почетокот од наредната година се очекува да биде завршен и булеварот „Партизанска„
„Веќе во наредниот месец голем дел да биде завршен, односно првата фаза од „Партизанска„ да биде изасфалтирана. Веќе се започнати активности и на втората фаза, односно промена на главната водоводната мрежа од околу 600метри. Очекувам на почетокот од наредната година булеварот комплетно да биде завршен„ изјави Иван Јорданов, градоначалник на Штип.
Булеварот и еко паркот се градат исклучиво со средства на општината и чинат повеќе од 3милиони евра. Претходно со овие проекти, локалната самоуправа аплицираше за општинска обврзница, но беше одбиена од претходната власт.
Александра Ристевска