Судењето за Раде Трајковски – Штекли и неговите соработници за неовластена трговија со дрога се одложи. Причината е што првообвинетиот Штекли имал здравствени проблеми. При прегледот во затворот Скопје утринава бил неконтактибилен и дезориентиран, по што му е даден специјалистички упат за преглед на Неврологија. Сличен напад имал и вчера.
Судијата Илија Трпков првин го одложи судењето околу еден час за да се обезбеди присуство на обвинетиот. Потоа информира дека Штекли се уште не бил однесен на државната клиника, бидејќи мора да има наредба за полициcка асистенција при спроведување на обвинетиот, кој е од висок ризик.
Одбраната на Штекли претходно доставила психијатриско вештачење дека тој не е психички способен да ги следи рочиштата. Сега обвинителството побара од судот психијатри да го посетат во притвор и да направат ново вештачење.
Во судница беа спроведени дел од неговите соработници, од ефективен и куќен притвор. Седум од групата на Штекли се спогодија со обвинителството за затворски казни од 3 до 5 години. Обвинителството гони 10 членови заедно со него како глава на групата, за продажба на дрога во Скопје и на интернет, најчесто во кафуле во Аеродром без за тоа да знае сопственикот. Наредното рочиште е закажано за 7 август.
