35тиот роденден на Македонија освен Дејвид Гета ќе донесе и други спектакуларни изведувачи и изненадувања. Со настап на светскиот тенор Хозе Карерас и најголемите македонски музички имиња, на први септември на плопштадот Македонија ќе започне одбележувањето на независноста. Заедно со поддршката од Македонската Филхармонија, организаторите велат дека главната цел е да се соединат македонската музичка традиција заедно со светската класика.
„Сакавме да споиме нешто што е светско заедно со нашето македонско, кое ќе покаже дека воопшто во ниту еден сегмент не е ниту помалку светско, ниту помалку квалитетно. На 1 септември на градскиот плоштад во Скопје ќе имаме концерт на Хозе Карерас и Македонија олл стар. Ќе има многу изненадувања таа вечер, кои нема да бидат соопштени. Оваа екипа на Македонија олл стар е личен мој избор и јас носам одговорност дали требало да има уште некој друг“ – изјави Бобан Милошески од Авалон продукција.
Македонските ѕвезди велат дека е огромна чест и задоволство да се биде дел од ваков проект, за достоинствено прославување на македонскиот јубилеј.
„Сум била досега неколку пати на ваквите прослави и секогаш со големо заодоволство сум настапувала. Сега ми е посебно драго што освен нашите музички великани ќе ни се придружи и еден музички великан од светската сцена“ – изјави Гочева.
„Голем вистински момент е што Карерас ќе стапне на светата земја Македонија. Земја на музиката, земја на многу талентирани гласови и музичари и мислам дека ние ќе бидеме нежни со него и ќе го угостиме на начаин, што само ние умееме“ – рече Калиопи.
Влезот ќе биде бесплатен а истовремено ќе има и телевизиски пренос за оние кои нема да можат да присуствуваат. Од владата најавуваат и други настани и изненадувања.
