„Шеќерната приказна ќе стане филмска“ – ова беше еден од насловите во медиумите, кога на продуцентот Томи Салковски и режисерот Игор Иванов – Изи им беа одобрени 46 милиони денари, односно безмалку 750 илјади евра, народни пари од Агенцијата за филм, за да создадат македонски, анимиран игран филм за деца. Филмска адаптација на безвремената приказна за деца на Славко Јаневски. Но, „Шеќерното дете“ никогаш не го виде светлото на денот.
Овој проект кој доби најголема финансиска поддршка на конкурсот во 2016та, му беа одобрени и пари од странски, меѓународни фондови за филм. За негова реализација се чекаше се до промената на власта, кога продукциската куќа на Томи Салковски, „Скопје Филм Студио“ се откажа од снимање на филмот, па и покрај тоа што ја изневериле довербата на домашните институции и меѓународните партнери, Агенцијата за филм, во 2018-та повторно ќе ги награди Томи Салковски и Игор Иванов со најголема финансиска поддршка за таа година. Цели 42 милни денари, односно безмалку 700 илјади евра, народни пари за снимање на филмот „Хомо“.
Анимираниот филм кој иако никогаш не успеа да ги израдува децата, беше агресивно рекламиран на меѓународните филмски фестивали, во Литванија, Франција, Италија, Холандија и Германија.
За тоа, што се случи со него, прашавме во Агенцијата за филм, но оттаму одговор не добивме.
Нејасно е зошто проектот не е реализиран, но последниот извештај на Министерството за култура, фрла сомнеж за можни проневери.
- Агенцијата за филм не води соодветна ажурна евиденција за реализација на филмските проекти и нетранспарентно и без почитување на законските обврски врши исплата на продуцентските куќи – Пишува во надзорниот извештај на Министерството за Култура за работата на Агенција за филм.
Инаку, Игор Иванов Изи, кој требаше да го режира овој филм, е помеѓу оние кои најмногу се офајдиле од државната каса во изминтиве неколку години. Заедно со неговиот соработник, Томи Салковски, кој исто така ги наполнил џебовите со над сто милиони денари, народни пари. Истражувањата на ТВ Алфа обелодени серизни сомнежи дека овие двајца филмаџии, заедно со дел од раководството на Агенцијата за филм можеби го оштетиле државниот буџет. Но, од правосудните органи се уште нема никаква реакција.
Никола Цветкоски
