Само испукани и зачадени ѕидови останаа од домот на семејството на Стојан Коцевски од Волково. Неговата куќа во која живееше со татко му, сопругата и ќерката, изгоре до темел пред една недела и од тогаш се снаоѓаат како знаат и умеат.
Во првите денови им излегле во пресрет соседот, кој им отстапил соба за да преноќат, а помош дошла и од отецот Оливер од црквата Свети Спас од Драчево. Стојан вели дека најмногу му помогнале од извидничкиот порачански одред Јадран, како и од колегите од работа, кои дошле за да ја изнесат изгорената покуќнината од домот.
„Секоја помош е добредојдена. Во моментов ни е потребна финансиска помош, значи сместени сме, имаме кров над глава, облека ни дадоа, единствено што ни треба е финансиска помош. Доаѓаат луѓе рачно ни нудат помош. Жиро сметки се отворени, девизни денарски. Репороматеријали нешто да присобереме“, рече Стојан Коцевски.
Пожарот избил околу 1 и 30 часот по полноќ, од инсталацијата во собата на ќерката. Таа прва го забележала чадот и веднаш истрчала да ги предупреди да излезат од куќата и се спасат. За среќа до жртви не дошло.
„Станавме не разбуди ќеркава, снема струја во моментот. Значи главните осигурачи беа паднати, снема струја и значи почна да гори. Сите излеговме. Почнавме со црева, наши црева да го гасиме пожарот, меѓутоа не успеавме. Се јавија комшиите во пожарна. Дојдоа три коли за 15 20 минути. И они го угаснаа се локализираше пожарот. Изгоре за многу кратко време, не можевме ништо да спасиме. Еве доказот е сето ова надвор. Освен иконите што стоеја на регалчето, другото се изгоре“, рече Стојан Коцевски.
Пожарот брзо го изгаснале од противпожарната служба, потребни им биле 15 минути да стигнат, но не успеале да спречат поголема материјална штета. Стојан очекува во наредниот период помош од институциите за да може да му се врати на нормалниот живот. Семејството Коцевски се надева на помош и од сите хумани граѓани.
Жиро сметка за донација – 210500000373305 НЛБ Банка – Стојан Коцевски
Број за контакт 070 / 227 – 394 – Лидија Коцевска
Љубиша Владимиров
