Во Собранието жестока дебата, во Судскиот совет разговор на неважни теми. Додека пратениците дебатираа за судбината на петте членови на Судскиот совет, тие заедно со останатите членови си држеа седница и дискутираа за теми како ажурноста на судовите и си избираа вд генерален секретар на советот. Само екс претседателката Весна Дамева која oд стручен соработник стана член на советот по предлог на поранешниот претседател Стево Пендаровски, ги удостои пратениците со нејзино присуство во Собрание, останатите си тераа како и секој обичен ден.
Барањето за смена на клучните шленови во Советот, треба да биде само почетеок за потемелни реформи кои би можеле вистински да го кренат од дното судскиот систем. Но, вистински промени и реформи не се носат преку ноќ, ниту, пак, има реални шанси резултатите да се покажат во скоро време. Потребни се тимови на ниво на сите институции, анализи и нови закони, а првиот чекор за брзи резултати е откажување на политичарите од нивно влијание врз судската власт, коментира професорот Гордан Калајџиев.
Стопената доверба на граѓаните од само 2 % како и скандалозното однесување на членовите на Сускиот совет во изминативе години придонесе Владата да бара начини како да закрепне кревкиот судски систем. Покрај најавените реформи во правосудството, пратеничка група на ВМРО ДПМНЕ поднесе интерпелација за членовите на Советот кои се избрани во Собрание бидејќи не им помина извештајот за сработеното за ланската година.
Дури и меѓународната заедница реагираше за нивната работа. Поради нивните скандалозни одлуки во Советот досега и дел од амбасадорите откажаа соработка и прекинаа проекти наменети за македонското правосудство.
Судскиот совет изминативе години работи со голем број скандали и е критикуван за несовесно работење од претставниците на межунаародната заедница кај нас.
Оценската мисија на ЕУ која влезе во советот по избивањето на скандалот со разрешувањето на претседателката Весна Дамева даде 40 препораки ова тело самото да се реформира, но досега ништо не видовме од тоа.
Исто така и последниот извештај на ЕК говори за партиски влијанија и непотизам при избори на судии во Судскиот совет.
