Јавниот градски превоз од изутрината се нормализираше. Откако владата вчера донесе одлука да му позајми нафта на ЈСП од државните резерви, за наредните седум дена, автобусите од гаражите се вратија на скопскиот асфалт. Граѓаните велат дека сега градскиот превоз е почест и дека не се чека со часови на постојките.
Директорот на ЈСП, Драги Кушовски, потврди дека нафтата навреме пристигнала во базните станици на претпријатието во Автокоманда и Ѓорче Петров и дека во текот на ноќта, резервоарите на автобусите биле наполнети.
На синоќешната вонредна седница, советниците во Град Скопје со 29 гласа, „за“ го усвоија заклучокот со кој предложија поддршка од Владата за ЈСП „Скопје“, за да може претпријатието редовно и нормално да функционира.
Одлуката на Владата ја поздравија советниците од ВМРО ДПМНЕ и СДСМ и рекоа дека Владата направила одличен потег, иако решението важи само за наредните седум дена. На градот Скопје му останува да изнајде долгорочно решение.
И градоначалничката го пофали Мицкоски за одлуката да се даде државна нафта за градските автобуси. Арсовска се пофали дека јавните претпријатија во време на криза без ниту еден денар помош, успеале да ги испорачаат услугите на граѓаните, но се правдаше дека таа не била виновна зошто немало нафта, туку Бирото за јавни набавки, зошто ја стопирало процедурата.
На синоќешната вонредна седница беше постигнат и консензус од координаторите на советничките групи, заедно со единицте на локалната самоуправа (ЗЕЛС) да продолжат разговорите со Град Скопје и јавните претпријатија за нормализирање на состојбите со градскиот превоз.
Инаку градоначалникот на Шуто Оризари Курто Дудуш за денеска најави протести со барање за нормализирање на јавниот превоз, а на истиот ќе се приклучат и студентите од УКИМ и синдикалните организации. Протестот ќе се одржи пред бараките на градот Скопје.
