Обвинителството бара 48 часа притвор за тројца од петмината приведени, под сомнение за поврзаност со исчезнувањето на четиринаесет годишната Вања Ѓорчевска од Скопје.
- „За тројца од петтемина приведени во текот на вчерашниот ден, јавен обвинител до Основниот кривичен суд Скопје достави предлог за определување 48-часовен притвор со цел да биде обезбедено нивното присуство до целосно расчистување на настанот. Јавното обвинителство и МВР ќе ја информираат јавноста веднаш штом се создадат услови кои нема да ја нарушат постапката.“ – Информираат од ОЈО.
Ова следи откако министерот за внатрешни работи, Оливер Спасовски, вчера соопшти дека се приведени петмина, а запленет за вештачење е и еден автомобил за кој полицијата се сомнева дека е поврзан со исчезнувањето на младата ученичка. Откако Спасовски порача и да не се шират шпекулации, сега од обвинителството најавуваат најостри казни за оние кои ќе шират лажни вести за настанот кој ја потрсе нацијата.
- „Сите шпекулации кои имаат за цел да ја компромитираат истрагата во овој момент ќе бидат најостро санкционирани“ – соопшти Јавното обвинителство.
Досега, во рамки на истрагата за пронаоѓање на Вања Ѓорчевска, во околината на центар се пребарани сите подруми, сослушани сведоци, прегледани се видеа од 50 камери, следен е сигналот на телефонот, пребарани се манастири, како и коритото на реката Вардар, а истрагата продолжува. Инаку, 14-ет годишната Вања Ѓорчевска е висока 175 сантиметри, со кафени очи и темно кафена коса. Носи протези за заби и има бемка на десната страна од лицето. Исчезна во понеделникот во утринските часови на пат кон училиштето Песталоци.
Никола Цветкоски
