„Пукна“ прекршочна за Дрин Ахмети. По една година полниот багажник опасна пиротехника, се сведе на седум петарди и 15 кутии ракети за огомент. За обвинителите ова било мало количество, па немало причина за кривична одговорност.
-Во однос на кривична одговорност, вешто лице изврши увид и анализа на запленетите пиротехнички средства и детално констатираше поединечно за каков вид на пиротехнички производи станува збор. Согласно извршеното вештачење, во конкретниот случај се работи за 7 петарди и 15 кутии со ракети за огномет, чии испалувања биле евидентирани поединечно, но во суштина се поврзани и претставуваат една целина. За набавката на огнометот пријавениот поседувал фактура од правно лице чија што дејност е продажба на пиротехнички средства, а за изведба на огнометот било ангажирано друго правно лице, велат од ОЈО.
Младиот Ахмети и стана познат на јавноста кога беше откриено дека е сопственик на трговскиот центар „Соравија“ во срцето на Скопје.Тој без вложен денар на свое име поседуваше 39 проценти од трговскиот, а откако случајот почна да се проблематизира се откажа од сопствеништвото. Се бараше отворање на постапка за проджабата на Соравија, но обвинителите решија само да бидат неми посматрачи.
По овој скандал се појави и самиот Дрин, а својот чичко Али го прогласи за мотивација.
-Али Ахмети ми е чичко и Бог да го благослови. Тој ми е мотивација. Ахмети ѝ помогна на оваа држава. Немаше да ја имаме Македонија денес ако го следевме Љубчо Георгиевски кој ќе ја поделеше државата“, рече Дрин Ахмети на 26-ти јуни 2023-та година.
И понатаму јавноста сведочеше за нови и нови скандали со кои се поврзуваше тој. Ги покажа и своите претприемачки способности. Од фондот за иновации доби грантови во износ од 82 илјади евра. Дрин се има офајдено и од ЕЛЕМ. Преку два тендери од македонските Електрани добил речиси 90 илјади евра. За добиените грантови, младиот Ахмети стана и случај за антикорупционерите. Поради сомнение за незаконско работење ДКСК тогаш побара разрешување на тогашниот директор на Фондот за иновации Фестин Халили, кој сега се соочува со кривична пријава, поради сомнежи за криминал додека бил на функција.
Матеја Петровски