Вештачката интелигенција веќе ја менува светската, а и македонската економија –се отвораат нови работни места, но истовремено се укинуваат голем дел од постоечките. Најголем дел од професиите кои ќе исчезнат се оние со повторувачки задачи и оние во центрите за грижа на корисници.
Сепак, крајниот резултат треба да биде поголема продуктивност, подобар стандард, побрзи и поефикасни услуги, помалку грешки, поголема транспарентност, но само доколку навреме се прилагодиме на промените.
„190 милиони нови позиции глобално ќе се отворат а околу 92 ќе замрат. Следната професија што интензивно че биде барана и ќе се очекува да се знае е дефинитивно таа што е поврзана со дата- дата аналист, дата сајентист, дата администратор.“– вели Валентина Тасева, генералниот директор и сопственик на Семос Едукација.
Домашните бизнисмени велат дека новите технологии веќе се дел од нивното работење и оти никој не треба да се плаши од промените.
„Компаниите треба да ја применуваат секаде каде што можат. Не е прашањето дали има некоја стратегија зашто толку брзо напредува како што кажавме па така ако јас почнам денес да работам со вештачката интелегенција, а вие започнете утре никогаш нема да ме стигнете.“– вели Ведран Бајер, генерален менаџер на Wonderful за адриа регионот.
Тие советуваат – како држава треба да работиме на културата на постојано учење, едукацијата на пазарот и на вработените се клучни парааметри за прифаќање на дигитализацијата.
„Нашата улога е да демонстрираме дека финансиската услуга може да биде подеднакво брза, едноставна и логична како секоја современа дигитална апликација.. Значително ја променуваме навиката на нашите корисници од физичко аплицирање кон целосно дигитални процеси.“– вели Бјанка Катру, заменик извршен директор на М Кеш.
„И да сме ние целосно дигитализирани ако целиот систем не е дигитализиран и користи технологија не е доволно за развој на државата пред се…Сајбер безбедноста е една точка на која што апсолутно сите треба да се посветат доколку сакаме побрз развој на технологијата и дигитализција на економијата“– вели Стевчо Ристески, директор за продажба на А1 Македонија.
Надлежните тврдат дека се силно посветени на модернизација и дигитализација. Министерката за финансии вели дека вештачката интелегенција е составен дел од Националната развојна стратегија 2024–2044 која е фокусирана на економски раст, јакнење на конкурентноста и изградба на функционални институции.
„Дигитализацијата значи поефикасни и потранспарентни институции, помалку бирократија, подобра наплата на јавните приходи и пофер деловна средина. Сајбер-безбедноста е предуслов за стабилен и сигурен финансиски систем, а вештачката интелигенција веќе отвора нови можности за индустријата, финансискиот сектор и пазарот на труд“– вели министерката за финансии Гордана Димитриеска-Кочоска.
Дигиталната трансформација е една од темите на самитот Economist MeetUp „The World Ahead“ кој деновиве се одржува во Скопје.
