Не тргнуваме од нула, тргнуваме од минус два. Македонскиот спорт, кој пред само неколку години носеше европски титули, во моментов е оставен во кататрофална состојба, пред новото Министерство за спорт следи тешка работа.
Министерот Борко Ристовски во отчетот за првите 100 дена, вели дека имаат јасна визија и проекти за повторно враќање на сјајот на македонскиот спорт, но и ревизија за злоупотребите од претходната власт од претходната власт, за што кривична пријава доби поранешниот директор на АМС Дарко Каевски.
-Затекнавме нефункционална институција, со покренати обвиненија за корупција поради неправилностите во работата на поранешната Агенција за млади и спорт, за што постојат и обвиненија. Затекнавме фиктивни национални спортски федерации, без активности кои што добивале државни пари. Затекнавме нарушени односи, незадоволни спортисти, девалвирани репрезентативци, олимпијци без норми, изјави Ристовски.
Главната цел е унапредување на спортската инфраструткура, бидејќи според Ристовски таа насекаде низ Македонија е во катастрофална состојба, а е главен услов за развојот на младите спортисти.
Само во првите три месеци за врвниот спорт исплатени се 83 милиони денари поддршка за федерациите и клубовите, кои имаат меѓународни настапи.
-Обезбедивме 550 милиони денари за исплата на државните субвенции во спортот, средства кои од претходната власт беа ветени за т.н. ваучер систем, но воопшто не беа буџетирани, односно не биле планирани да бидат исплатени. Важно е да нагласам дека овие средства, ќе бидат доделени на транспарентен начин, со јасно дефинирани критериуми и процедури, за да осигураме дека поддршката од државата стигнува до оние клубови и федерации, поединци кои навистина ја заслужуваат, изјави Ристовски.
Ристовски откри и дека е постигнат џентмленски договор, спортските легенди повеќе да не ги рекламираат брзите кредити, обложувалниците, казината и секаков вид на игри на среќа.
-Горан Пандев повеќе нема да спортска кладилница, што и да е тоа. Иџе повеќе нема да го рекламира тоа што го рекламира. Кирил Лазаров му престана и нема да го продолжи договорот со ВЛТ, кој што ги рекламираше казината и кладилнците. Многу набрзо овие личности ќе ги видите од другата страна, како промовираат вистински вредности, изјави Ристовски.
Покрај професионалниот Министерството за спорт, целосно ќе го поддржува и аматерскиот и масовниот спорт. Ристовски кажа дека веќе оваа година биле поддржани Охридскиот пливачки маратон, европската недела на спортот, а Министреството од оваа година е генерален покровител и на скопскиот маратон.
Матеја Петровски
