Граѓаните конечно гледаат видливи резултати, а не само празни ветувања како во минатото. Вака дел од политичките аналитичари ги коментираат резултатите од анкетите во кои премиерот и владејачката партија котираат на врвот. Тоа што голем процент од гласачкото тело на следни избори би гласале за ВМРО ДПМНЕ и тоа што премиерот има седум пати поголем рејтинг од Венко Филипче е одраз на работа и политики без отстапки со кои порано Македонија одеше во пропаст, вели Ристевски.
„Најмногу сето ова што се случува се должи на искреноста на конкретни чекори и не дозволување на оној магичен круг кажување едно правење друго, како во минатото. Го слуша ставот на народот за европските прашања“, вели Александар Ристевски, политички аналитичар
Саркастичните соопштенија на опозициската СДСМ и споредбата на рејтингот на ВМРО ДПМНЕ и високата цени на пиперките, за Ристевски претставуваат очајни обиди да се креира вештачко незадоволство. Исто така според него се и небулозни бидејќи од памтивек во Македонија се знае дека цените се високи на одредени земјоделски култури кога не им е сезона.
„Како политички субјект кои со сигурност доаѓа на дно и длабоко тоне, нема друг начин како да се факторизира во општеството освен со креирање на вештачко незадоволство, на нестабилност и дисфункционалност“, вели Александар Ристевски“, политички аналитичар.
Анкетите на порталот мкд.мк и Маркет вижн покажаа дека и по речиси две години на власт, рејтингот на владејачката партија и премиерот останува стабилно висок и значително пред опозицијата. Според анкетата, 25,2 проценти од испитаниците изјавиле дека имаат најголема доверба во Мицкоски, што е убедливо највисок резултат меѓу лидерите – петпати повеќе од Али Ахмети и дури седумпати повеќе од Венко Филипче.
Рејтингот на Мицкоски е речиси изедначен со поддршката за ВМРО-ДПМНЕ, за која 24 проценти од граѓаните би гласале на избори.
На второ место е коалицијата „Вреди“ со 5,1 отсто, по што следуваат СДСМ со 4,9%, ДУИ со 4,8%, Левица со 3,1% и ЗНАМ со 2%.
Сепак, значителен дел од граѓаните се неопределени – 28,1% изјавиле дека нема да гласаат, а 9,7% се уште не знаат дали ќе излезат на избори.
