Боки 13 се заканува ќе се отворела Пандорината кутија, откако денеска во судницата беше пуштен дел од аудио снимките кои ги снимал Зоки Кичеец. Обвинителката Русковска побара јавноста да не биде присутна кога ќе се пуштаат дел од снимките бидејќи биле од приватен карактер, по што и осомничените и нивните бранители побараа медиумите да не ја напуштат судницата.
„Од овој момент ја отворам Пандорината кутија. Барам да не ја исклучувате јавноста и да се види јавно мојот однос со Зоран Милевски и неговата манипулација. Досега не видовме ниту еден доказ туку само сензационализам”, рече пред судот Јовановски.
За јавноста да биде присутна се залагаше и екс специјалната обвинителка Катица Јанева, која негодуваше на предлогот за исклучување на медиумите.
„Јас ќе кажам нешто во име на сите од одбраната. Бараме да не биде исклучена јавноста. Цело УСБ од Кичевскиот да се презентира. Да се види кој манипулира, кој нуди рекет, кој нуди поткуп, кој е изманипулиран““, рече таа.
Во еден од фолдерите на мемориските стикови од Кичеец, имаше три разговори кои заедно траеја околу час и половина.
Но, снимката која беше пуштена во судница и која според Јанева и Јовановски требаше да открие што всушност се крие зад целиот предмет, за јавноста остана нејасна. Новинарските екипи, освен брмчење на автомобил, отворање и затворање врати, тропање, музика и по некој недоличен и вулгарен збор, не успеаја да разберат ништо друго.
Откако заврши снимката обвинителката Русковска само појасни дека на неа се слушаат гласови на Кичеец, Камчева и Јовановски.
Покрај аудио снимките од Кичеец, денеска на рочиштето беа пуштени и 16 аудио снимки кои ги доставил Камчев до обвинителството, како и една видео снимка. Во една од аудио снимките имаше разговори кои според обвинителството го воделе Јордан и Ана Камчеви со Боки 13 и Кичеец, а се зборувало во која болница да и се направи операција на Јанева.
Инаку поголемиот дел од денес објавените снимки веќе беа објавени преку италијанскиот весник Ла верита.
Мери Ѓорѓиевска
