Поранешниот припадник на УЧК, косовецот Блерим Рамадани избегал од куќниот притвор откако доушник му кажал дека полицијата се подготвува да го спакува и однесе во Шутка. Одлуката Рамадани да биде спроведен во ефективен притвор ја изрекле тројца судии, откако предходно судијата Пајазит Пајазити и покрај сериозноста на делото за кое се бара, на изненадување на сите, реши да го испрати во куќен притвор.
Во случајот со бегството на Блерим Рамадани, вистинското прашање треба да биде зошто судот одлучил да го стави лицето во куќен притвор наместо во ефективен притвор…. МВР во овој случај постапи согласно законот и максимално професионално. Лицето беше предадено на судот по барање на Интерпол, што е во согласност со позитивните законски прописи, пшишува Панче Тошковски на својот Фејсбук профил.
Рамадани беше уапсен во јули годинава на граничниот премин Јажинце по меѓународната потерница на Интерпол издадена од страна на Србија, а од 1 август кривичниот совет на судот во Скопје, го смести во куќен притвор, иако тој нема адреса во Македонија. Судијата Пајазити реши притворот да го одлежи кај свои роднини. Според пишувањата на косовските медиуми, тој веќе ја напуштил Македонија.
За премиерот Христијан Мицкоски ова е уште еден случај што го отсликува хаосот во правосудниот систем. Тој уште еднаш повтори дека до крајот на месецот чека конкретни предлози за реформите во правосудството, а потоа Владата како што рече ќе мора да преземе нешто за да ја врати довербата на граѓаните во правосудството.
И покрај тоа што вината за бегството на Рамадани очигледно лежи во судскиот систем, тоа не ја спречи опозициската СДСМ да го обвини министерот Тошковски дека е неспосбен за функцијата и побараа негова оставка.
Прашуваме како е можно да се дозволи бегство на затвореник баран со меѓунардона потерница? Дали дозволи да избега или е крајно неспособен да зачува криминален кој е меѓународно баран? Тошковски исто не одговори, како е можно само пред неколку дена други десет затвореници да избегаат од Шутка?, стои во соопштението на СДСМ.
Тошковски им реплицираше дека Со ваквите празни обвинувања, СДСМ само признава дека нивната некогашна власт ја оставила државата целосно руинирана.
Познавам писмени правници и во СДСМ кои ја разбираат поделбата на власта и знаат дека МВР и судот се различни институции, но жално е што раководството на СДСМ и нивната ПР служба ги игнорираат овие факти и обвинуваат за да добијат ситни политички поени, пишува Панче Тошковски.
Рамадани го бара Србија поради сомнение дека како поранешен војник на УЧК, извршил воени злосторства во регионот на Неродиме. Српскиот министер за внатрешни работи Ивица Дачиќ неодамна изјави дека очекува македонските власти да го екстрадираат Блерим Рамадани.
