Во населбата Припор во Кисела Вода денеска свечено е пуштена во употреба нова спортска сала во рамки на подрачното основно училиште „Круме Кепески“. Вкупната инвестиција е околу 20 милиони денари и се протега на површина од 440 метри квадратни. Изработена е според најсовремени стандарди.
– За населбата Припор ова е барање веќе подолго време што го реализираме во соработка со Владата и со Министерството за образование и наука, изјави градоначалничката на Кисела Вода, Бети Стаменковска.
Во изминатите две години, како што кажа министерката за образование и наука Весна Јаневска, вложени се околу 90 милиони евра во огромен број на проекти. Само во Кисела Вода покрај оваа сала, ќе се гради сала и во училиштето „Кузман Јосифовски – Питу“ и ќе се реконструираат салите во „Круме Кепески“ и во „Кузман Шапкарев“.
Премиерот Христијан Мицкоски, кој исто така беше на отворањето на спортската сала, изјави дека повеќе од 1.200 проекти се реализираат на ниво на држава.
