Монструозното убиство каде еден малолетник крвнички уби друг малолетник ја покажа целата трулост на нашиот институционален систем. Македонското општество не е подготвено успешно да се справува со предизвиците со кои се соочуваат современите деца. Свесното или несвесното замижување на возрасните уште пред првите знаци дека одредено дете има проблем, е кардинална грешка, која најчесто завршува со трагедии кои нормалниот ум не може ни да ги замисли, ни да ги прифати, сметаат психолозите.
- „Имал ножеви, бил пријавуван, имало напади и претходно каде што тој учествувал во тепачки со ножеви или без ножеви, како и да е. Тука е проблемот што институциите потфрлаат многу и едноставно што овие вакви закани по живот и некои знаци дека може да дојде до нешто поекстремно ги игнорираме и не ги сфаќаме сериозно…Ова покажува екстремно насилство зашто детето било избодено дури 10 пати. Значи да бидете во таква состојба на свеста каде што ви е заматена и каде што не е само еднаш или двапати, се исплашуваш, го тргаш ножот и си заминуваш, туку тоа е огромен бес кој што го истурил 10 пати врз невината жртва. Тоа покажува дека имаме дете-убиец“, – ни изјави за Алфа, Ана Алексоска, КБТ- психотерапевт.
До 18 години, многу е важна улогата на семејството, вели Алексоска и додава дека ниту еден родител не смее да се срами или да крие дека неговото дете има психички проблеми или е екстремно насилно, туку треба веднаш да се преземат сите мерки.
- „Кога имаме вакви некои видливи знаци дека можно е насилство и кога веќе имаме насилство, веднаш треба да се преземе тоа во рацете на институциите, посебно прво училиштето разговара со мајката, потоа да се препорача психо-терапевт и да се работи со целото семејство. Ова сега ако не е знак дека нешто труло и нешто лошо се случува во нашето општетство, јас не знам што би требало следно да се случи. Детето имало и список, имало и закани за понатаму да ги исполни своите цели кои што се монструозни“, – децидна е Алекосока.
За нефункционалноста на институциите, во потресно сведоштво за Алфа, обвини и мајката на убиениот 14-годишен Александар која рече дека 16-годишното дете-убиец наместо да се лекува, тоа било било пуштено слободно да се шета, наоружано со ножеви и да убива по напишан список.
- „Само правда барам, оти ако го пуштат, тој и други деца ќе отепа, оти си имал список, си планирал, список си имал со 10 деца да отепа“, – низ солзи раскажува Маријана Димова, мајка на убиениот Александар Димов.
Осомничениот 16- годишник веднаш по крвавиот настан го призна убиството и е во 30-дневен притвор, а мотивите за крвавиот маскар се’ уште не се познати.
Каролина Дурло
