Со црковни литургии изутрината започна да се слави Успението на Пресвета Богородица и заврши двонеделниот пост за големиот христијански празник. Според верата, Мајката Христова, Богородица е заштитничка на леунките и на жените им помага при породувањето. Исто така и жените што немаат деца веруваат дека со милоста на Пресвета Богородица ќе добијат рожба поради што ги посетуваат нејзините цркви, изведуваат некои обичаи, се молат и принесуваат дарови.
Македонскиот народ со повеќе свечености и со народни собири и панаѓури го слави празникот познат кај народот и како Голема Богородица.
Поради големото значење на Пресвета Богородица за црковнота историја, православните христијани се воздржуваат од мрсна храна две недели пред празникот.
Поради големиот култ што го има мајката Божја меѓу верниците, овој празник се празнува многу свечено со големи народни собири. Меѓу позначајните празници што македонскиот народ ги празнува со посебно внимание се и неколкуте празници на Пресвета Богородица, мајката на Спасителот Исус Христос. Поради тоа и повеќе цркви низ цела етничка Македонија го носат нејзиното име.
Верници не само во главниот град, туку низ цела Македонија ги наполнија храмовите. Палеа свеќи за здравје и бериќет, но и за мир и напредок на сите луѓе.
Како што налага традицијата, по црква се оди на ручек кај постарите, но се почесто верниците не готват дома и празникот го поминуваат низ угостителските објекти.
Државниот врв испрати честитки по повод верскиот празник. Претседателката Сиљановска Давкова, премиерот Мицкоски и спикерот Гаши на верниците им посакаа разбирање, добрина и меѓусебна почит.
