Граѓани и активисти од Кочани, рано утринава , го блокираа патот кон Пониква, кој води до депонијата кај селото Бели. Не дозволуват комуналните возила од околните места да вршат дотур на смет во Градската депонија. Ниту градежната механизација, која вчера влезе и почна да ја чисти и санира депонијата, не успеа да ги предомисли еко активистите, протестите да ги стават во мирување.
„Целта ни е да спречиме дотур на отпад од околните места, затоашто нашата депонија нема капацитет ни градска да биде, а најмалку регионална. Имаме едно и единствено барање, каде е депонијата таму да се чувствува. Никој не ја сака ни во дворот, ни во собата, ни во душата„ изјави еден од организаторите на протестот, Благица Сабовлјевик-Стоименова.
Блокадите ќе траат деноноќно, децидни се граѓаните. Преземањето на вакви радикални мерки велат, е единствениот начин за да го изразат своето незадоволство од нерешавањето на проблемот со горењето на отпад. Тврдат, дека енормното загадување на воздухоте причина за зголемениот број на граѓани, со респираторни заболувања.
„До умирачка ќе останеме, 24/7. Драги сограѓани, организираме депонијада. Повелете, ќе биде весело. Подобро да е весело, отколку да е тажно, како што се тажни изминатите шест месеци со енормно зголемен број на заболени„ изјави еден од организаторите на протестот, Благица Сабовлјевик-Стоименова
Рано утринава е веќе разговарано со граѓаните, вели за Алфа, градоначалникот на Кочани, Љупчо Папазов.
„На граѓаните им е посочено дека депонијата ќе се обезбедува 24часа, со што ќе се контролира влегувањето на неовластени лица, за да се спречи намерното потпалување на истата. Депонијата, целосно ќе биде затворена за да нема чадење, а ќе биде третирана и со морски алги. Побаравме да ги пуштат возилата на кочанското комунално претпријатие, со цел градот да не се затрупа со смет“, вели во телефонски разговор, градоначалникот на Кочани, Љупчо Папазов.
Градската депонија во Кочани, стана сериозен проблем за градот откако на неа почна да се исфрла и отпад од соседните општини, како дел од обврските што се наметнаа со проектот изградба на регионална депонија кај Свети Николе.
Александра Ристевска
