Просторот пред спортската сала „Расадник“ во Кисела Вода забрзано се трансформира во модерно урбано катче. Со врши поплочување со травертин, се гради светлечка фонтана, ќе бидат поставени нови клупи и модерно осветлување. Наскоро ќе следи и целосно хортикултурно уредување кое дополнително ќе го оплемени овој дел од населбата.
Градоначалничката Бети Стаменкоска Трајкоска денеска изврши увид во завршните работи од изградбата на новиот сквер, кој се протега на површина од 4.535 квадратни метри. Овој проект, како што информираат од локалната самоуправа, се реализира со средства обезбедени од Владата, како дел од инвестициите за капитални проекти во општините.
-Ова е простор кој жителите на Кисела Вода многу го сакаат и навистина ми е драго што конечно го добива изгледот кој го заслужува. Со новиот плоштад, убавата фонтана и зеленилото, просторот пред салата „Расадник“ станува вистинско место за одмор и дружење на сите генерации. Министерството за спорт веќе ја завршува целосната реконструкција на самата сала, а преку овој проект, поддржан од Владата на Македонија, ние го уредуваме просторот околу неа. Така заеднички покажуваме како се работи за граѓаните и како еден култен објект за нашата општина комплетно заживува со нов, модерен и функционален лик- изјави градоначалничката Бети Стаменкоска Трајкоска.
