Факултетот за драмски уметности – Скопје и Факултетот за музичка уметност – Скопје вечер ќе го промовираат новиот, единаесетти број на меѓународното научно списание за изведувачки уметности „Ars Academica“, кое веќе десет години претставува значајна академска платформа за современи истражувања и теоретски промислувања од областа на театрологијата, музикологијата, драматологијата, филмологијата, танцувачките и визуелни уметности, односно од областа на изведувачките уметности.
Како што информира ФДУ – Скопје, промоцијата ќе се одржи на сцената на Факултетот за драмски уметности – Скопје. Настанот ќе ја одбележи успешната децениска соработка меѓу двата факултета и ќе ја потенцира важноста на списанието за академската и уметничка заедница како релевантен научен ресурс и единствен простор за интердисциплинарна размена на идеи и современи истражувања.
Списанието го должи своето основање и концепт токму на заедничката, визионерска иницијатива на проф. д-р Ана Стојаноска и проф. д-р Соња Здравкова-Џепароска, кои ја поставија рамката за неговиот интердисциплинарен и современ карактер.
„Ars Academica“ содржи научни трудови кои обработуваат актуелни, современи теми и проблематики од изведувачките уметности, со особен фокус на интердисциплинарноста, новите методолошки пристапи и развојот на критичка мисла во уметничките и теориските практики. Трудовите се рецензирани од домашни и меѓународни експерти од областа.
Во овој број се застапени автори чијашто работа носи нови научни увидувања и анализи: Евица Тасеска-Каранфилова, Илија Циривири, Милчо Узунов, Биљана Тануровска-Ќулавковски, Сашо Кокаланов, Деспина Ангеловска, Сашо Димоски и Елизабет Колевска. Тие разработуваат актуелни теми од продукциските практики, интеркултурните и миграциските процеси, современите театарски и филмски модели, како и новите танцови и едукативни методологии. Овие трудови, засновани врз конкретни примери, студии на случај и аналитички пристапи, го прикажуваат виталниот развој на изведувачките уметности и нивната трансформација во современиот културен контекст.
Списанието е достапно и во електронска форма, на следниот линк: http://www.fdu.ukim.edu.mk/pdf/ArsAcademica_011.pdf
