Бербата на грозјето, чиј род годинава се очекува да тежи околу 100 милиони килограми, влегува во својот финиш. Досега се откупени над 78 милиони килограми од неколку лиценцирани откупувачи. Меѓутоа, и покрај ваквата динамика на откупната кампања, годинашниот гроздобер останува да биде мегдан за политички препукувања помеѓу опозицијата и власта, како веќе видена претстава од предизборниот фолклор.
„Лозарите се оставени на цедило, а грозјето им скапува на нивите. Најавеното решение за проблемот со откупот се претвора во нова агонија. Денес гледаме забавена динамика на откупот, празни ветувања и повторување на старите сценарија. Дали се подготвува нова измама на лозарите, како онаа од 2016 година, кога партиски блиските визби добија пари, а лозарите останаа со неплатено грозје?!“, – обвинуваат од опозициската СДСМ од Кавадарци.
За ВМРО-ДПМНЕ пак, ваквите обвинувања се само беден манупулативен крик на очајни луѓе, бидејќи откупот на грозјето се одвивал со нормален тек, но СДСМ не сакала да признае дека оваа Влада, е посветена на земјоделците и на работењето за нив.
„Поради посветеноста на ресорното Министерство, лозарите оваа година имаа вода за наводнување со што се придонесе за зголемување на приносите. Оваа година има над 100 милиони кг винско грозје. Лозарите многу добро ја паметат „загриженоста“ на СДС и тој период кога поради ниските откупни цени останаа необрани милиони килограми винско грозје. Манипулациите на СДС не поминуваат, нека гледаат како се работи и како се креираат мерки во корист на земјоделците“ – возвраќаат од ОК на ВМРО-ДПМНЕ од Кавадарци.
И министерот Трипуновски останува на ставот дека годинава има одлична откупна капмања и дека ни едно зрно од произведеното грозје нема да остане неоткупено. Годинава, грозје веќе откупуваат четири лоценцирани винарии, а дополнително се вклучува и уште една.
„Она што сакам да го упатам е дека лозарите не треба да бидат загрижени. Ние интензивно изминативе денови го следиме откупот и динамиката на откупот на винското грозје. Одредената количина за која меѓу лозарите се стравува дека нема да се откупи – не е точна. Од утре веќе влегува во откуп уште една Винарска визба, тоа е „Вардар винарија“, која што овдека во Кавадарци ќе ги отвори своите порти и ќе ја собере дополнително онаа количина која што ќе се појави за откуп“, – истакна Цветан Трипуновски.
Инаку, годинава е постигната рекордна откупна цена за двете најзастапени вински сорти на грозје, или 21,3 денари за килограм „вранец“, и 18,9 денари за килограм „смедеревка“.
