Со искрени желби за здравје, среќа и бериќет, а пренесени од најсаканиот дедо на светот – Дедо Мраз, градот под Марковите Кули од под симболот на градот – Градскиот саат, со богата предновогодишна програма ја испраќа веќе изветвената 2023-та година.
„Пожелувам среќна Нова година, среќни Божикни празници. Здравје на сите и се’ друго останато, односно пари повеќе. Без пари нема здравје, нема љубов, нема среќа“, – порача прилепскиот Дедо Мраз.
- „Кажи ми, која ти е желбата, што да ти донесе Дедо Мраз за Новата година“ ?
- „Да учам многу и да имам книги“.
- „А дали сакаш Дедо Мраз да ти донесе некоја играчка“?
- Не, јас сакам книги“, – ни рече малата Марија.
„Јас сакам куче да имам, новогодишната желба ми е куче, и да, јас веќе му ја испорачав на Дедо Мраз“, – ни кажа 10-годишната Таиса.
„Мило ни е што на денешниов прекрасен ден ги завршуваме трите денови од предновогодишниот Базар. Во исто време сакам да им ја честитам и Новата година, не само на моите сограѓани, туку и на сите гости. Средствата кои ги планиравме за дочекот на Новата година ќе бидат наменети за хуманитарни цели“, – изјави градоначалникот на Прилеп, Борче Јовчески.
Инаку, годинава за првпат, во прилепската Стара чаршија беше организиран тридневен предновогодишен Базар, кој според организаторите, има тенденција да прерасне во традиционален.
Каролина Дурло
