„Водич за вештачка интелигенција“ беше презентиран денеска во Министерството за образование и наука. Како што беше кажано на настанот, тој е наменет за наставници, стручни соработници и ученици.
-Како што и најавив, од оваа учебна година вештачката интелигенција влегува во училиштата. Сосема логичен и нужен чекор во процесот на дигитална трансформација на образовниот систем, што значително ќе го унапреди квалитетот, ефикасноста и инклузивноста на образованието во Македонија. Се работи за технолошка иновација чија примена во сите сфери е глобален тренд, а ние како Влада со поширока поддршка од професорската и експертската заедница, заедно со наставниците, ќе се трудиме да го следиме тој тренд, рече министерката за образование и наука Весна Јаневска.
За водичот за примена на генеративната вештачка интелигенција во образованието, таа рече дека на 120 страници, сеопфатно се осврнува на историјата на вештачката интелигенција и дефинициите за неа, на видовите вештачка интелигенција, како на примената на најпознатите алатки на вештачката интелигенција за создавање и уредување текст, за слики и мултимедија, за истражување и учење, за музика и слично.
– Понатаму, како да се користат алатките по одделни области – математика, природни науки, јазици и литература, историја и општествени науки. Како да се препознаваат можни злоупотреби на податоци и слично. Во суштина, содржи препораки што се наменети за наставниците, стручните соработници и за учениците, подвлече Јаневска.
Како што појасни министерката, наставниците и стручните соработници ќе треба да научат како најлесно да го пренесуваат знаењето за придобивките и ризиците од користењето на вештачката интелигенција, но, исто така и да препознаваат злоупотреби на новите технолошки алатки од страна на младите.
– За учениците пак, има препораки како етички да ја користат вештачката интелигенција за образовни цели и да препознаваат можни манипулации и злоупотреби на приватност, додаде Јаневска.
Беше нагласено дека водичот во електронска форма ќе биде споделен со сите училишта и многу наскоро заедно со факултетот и со Бирото за развој на образованието ќе започнат обуки за наставниците, односно ќе се обучуваат ментори кои понатаму ќе го пренесуваат знаењето до сите наставници во училиштата.
– Во моментов имаме јавен повик за пријавување на наставници само од средните училишта, што е дел од соработката со групацијата Бреинстер, истакна Јаневска.
Деканот на Факултетот за информатика, Универзитет „Гоце Делчев“ – Штип, Сашо Коцески рече дека вештачката интелигенција се развива со голема брзина. Тешко е, додаде, во еден документ да се опфатат сите работи, па затоа се препорачува да се надоградува водичот.
– Едукацијата е најдобра превенција. Најдобро е да се едуцираат децата, но и наставниците, рече тој, посочувајќи дека децата имаат пристап до вештачката интелигенција.
