Заради стотина луѓе блокиран е патот на Македонија кон Европската Унија. Дали некој може да гарантира дека уставните измени и внесувањето на Бугарите во Устав, ќе бидат последното барање на Бугарија, за да ја ослободи Македонија на европскиот пат. Ова се прашањата кои премиерот Христијан Мицкоски ги постави пред стартот на самитот на НАТО во Вашингтон.
-Ние нема да може да бидеме спремни да ги отпочнеме преговорите, ако не вметнеме неколку стотини наши граѓани во Уставот. Што значи дека тоа е дел од бугарското малцинство во Македонија. Но, дали ова е последно барање? Кој може да ни гарантира дека ова е последно? Во ред, немаме одговор на тоа прашање, изјави Мицкоски.
Премиерот вели дека пред Бугарија да бара Македонија да ги исполи уставните измени, треба да си ги погледнете и обврските на свој терен, односно да ги испочитува обврските согласно пресудите на судот во Стразбур.
-Која институција во Европа е задолжена да суди, дали нечии права се испочитувани? Ние збориме за Судот за човекови права во Стразбур. Ние имаме 14 пресуди од Судот за човекови права во Стразбур, кои велат дека човековите права на македонската заедница во Бугарија се повредени и се под рестрикција, а такво нешто е нула за бугарското малцинство во мојата држава. И тука се поставува логичното прашање, чии права се повредени и која е целта за таквиот чекор?, праша Мицкоски.
Покрај спорот со Бугарија, тема во Вашингтон ќе биде и Преспанскиот договор, односно незадовлството на Грција, што новата македонска власт го користи името Македонија без придавката Северна. Останува отворено прашање дали ќе има средба меѓу Мицкоски и грчкиот премиер Кирјакос Мицотакис. Меѓутоа од официјална Атина јасно порачуваат дека Преспанскиот догоровор ќе биде тема во Вашингтон.
-Секако дека ќе се покрене прашањето за прекршување на основните одредби од Договорот од Преспа од соседната земја. Не знам за некоја планирана средба со премиерот на Северна Македонија. Не знам дали ќе се случи, но сигурно не постои нешто што е планирано од грчка страна, рече Амирас.
Главната цел на самитот на НАТО ќе биде да се зацвртси поддршката на Украина во битката со руската агресија. Се очекува украинскиот претседател Володомир Зеленски да побара и засилување во делот на оружјето со цел справување во конфликтот со Русија.
Матеја Петровски
