Жителите на село Фалише, тетовско, да ги затворат прозорците и да не излегуваат од дома, забрането е движење во радиус од два километри од фабриката за бои и лакови откако избувна пожар и горат околу 100 тони хемикалии. ЦУК алармира за енормна загаденост на воздухот. Директорот, Стојанче Ангелов побарал од Министерството за животна средина да испратат мобилна станица за мерење на загаденоста, но од Министерството добиле одговор дека таква не поседувале.
Поради високата температура постои опасност да се сруши и целата зграда и ѕидовите. Тука е забрането да се движат граѓаните. Апелирам да не излегуваат воопшто од дома ако нема потреба. Не се знае колкава е загаденоста но се работи за многу хемикалии“, изјави Стојанче Ангелов, директор на ЦУК.
Во наредниот период Центарот за јавно здравје ќе изврши испитување на водата и почвата.
„Наша препорака е без потреба да не се биде на ова место затоа што во моментов во воздухот имаме јаглен моноксид, јаглен диоксид, диоксини и други штетни материи. Исто така, во радиус од 2 километри на луѓето им се препорачува да бидат во своите домови и без потреба да не излегуваат надвор. Во наредниот период ќе се изврши испитување на водата и почвата за да се утврди дали има загадување“, изјави д-р Ратко Давидовски од Центарот за јавно здравје од Тетово.
Огнената стихија откако го голтна речиси цел магацин и продажен салон на „Евроком“, на површина од 1000 метри квадратни се става под контрола. Противпожарната единица Тетово со колеги од Куманово, Велес, Скопје и Гостивар успеаја да спречат пожарот да се прошири на соседните објекти.
