До 2027 година, Македонија ќе добие нов гасен интерконектор во соработка со Србија со должина од околу 67 километри. Се предвидува да ги поврзе гасните системи на двете земји: на македонска страна со приклучување кај Клечовце, а во Србија со националната гасоводна мрежа во близина на Врање. Министерката за енергетика Сања Божиновска на својата работна посета во Белград со нејзината српска колешка, ја истакна важноста на овој проект со стратешко значење за регионалната поврзаност и енергетска безбедност.
„Интерконекторот со Србија е клучниот проект што ќе ја отвори нашата земја кон нови извори на гас и ќе ја засили регионалната енергетска стабилност. Но ова е и една од најважните инфраструктурни врски за целиот регион – значајна не само за Македонија и Србија, туку и за цела Европа. Имаме завршени студии, усогласена рута и координирана акција која веќе се спроведува. Нашата цел е интерконекторот да стане реалност во најскоро време, затоа што секој ден е важен за сигурноста на граѓаните и економијата.“ истакна Божиновска.
Интерконекторот е предвиден да биде технички подготвен за идниот транспорт на водород, усогласено со долгогодишните европски енергетски цели и зелените политики. Забрзаната реализација на овој проект беше главниот фокус на посетата , а на неа се дискутирало за клучните техники, како и финансиските и институционалните чекори потребни за изградба.
„Гасниот интерконектор со Македонија е проект што има значење подалеку од нашите граници. Тој е дел од визија за регион кој е енергетски поврзан, стабилен и усогласен со европските цели. Соработката со министерката Божиновска и македонскиот тим е интензивна и конструктивна. Со поддршка од ‘Транспорт гас Србија’ и ‘Номагас’ ќе создадеме нова енергетска оска на стабилност меѓу двете земји. Се согласивме на интензивни редовни средби, со цел интерконекторот да стане реалност во најскоро време.“– истакна Српската министерка за енергетика, рударство и минерални суровини Дубравка Хандановиќ Ѓуровиќ.
За финансирањето има интерес и од Светската банка и други комерцијални банки, бидејќи интерконекторот претставува дел од пошироката визија за диверзифициран и сигурен регионален пазар. Двете држави, заедно со тимот од Секторот за нафта и гас и раководните лица од Номагас, МЕМО и МЕПСО, ја потврдија целосната посветеност за интензивна координација и навремено исполнување на сите обврски.
