Повеќе пари за плати, пензии и за инвестиции. Владата го усвои буџетот за следната година. Владата планира од државната каса да потроши 6,73 милијарди евра, а да собере 6,1 милијарди евра. Приходите и расходите се зголемени за 180, односно за 140 милиони евра. Министерството за финансии проектира дека од даноци ќе собере за 6% повеќе пари, а од придонеси за 4% повеќе средства. Капиталните инвестиции се намалени од годинешните 770 милиони евра на 660 милиони евра. Овие проекти треба да бидат главен двигател на економскиот раст, како и вложувањата од приватните компании, главно поради евтините кредитни линии финансирани со унгарски пари и зголемената потрошувачка на граѓаните.
За социјална заштита ќе има за 6,7% повеќе пари. Од буџетот за плати на администрацијата ќе има 855 милиони или 7% повеќе од годинава. Во оваа сума е опфатено и зголемувањето на платите со порастот на минималната плата. Транзициските трошоци односно уплатите во вториот пензиски столб ќе бидат 319 милиони евра што е пораст од 22,5%. За пензии вкупно ќе се потрошат 1,9 милијарди евра, или за речиси 10% повеќе.
Буџетот содржи мерки за фискална консолидација, па јавниот долг кој не се очекува годинава да надмине 60% од БДП, ќе биде стабилен и догодина. Дисциплинирано ќе се троши, а политиките ќе го поттикнуваат економскиот раст. Планирано е да се издаде еврообврзница во висина од најмалку 950 милиони евра, а ќе има и задолжување на домашниот пазар од 570 милиони евра. Овие пари се потребни за да се сервисира еврообврзницата од 700 милиони евра, да се подмират достасани обврски од 200 милиони евра и да се покрие дефицитот. Буџетот за 2026-та е скроен врз основа на проекции за поголем економски раст од 3,8%, пониска инфлација од 2,5 отсто и буџетски дефицит од 637 милиони евра или 3,5 проценти од БДП, што е за 0,5 пп помалку од годинава.
