Над 15.000 пастрамајлии, само сношти беа изедени во Штип. Ова е првичната бројка, но според организаторите бројот е уште поголем, ако се земе во предвид фактот дека специјалитетот освен на штандовите, можеше да се вкуси и во рестораните. Штипските мајстори, конечно победија во битката и докажаа дека штипската е повкусна од светиниколската, радовишката или велешката, коментираат посетителите
„Штипската пастрамајлија е најдобра. Ние како град, ја брендиравме и годинава конечно докажавме дека по квалитет е чиста десетка, а велешката, радовишката или кратовската се позади неа„ коментираат граѓаните.
Годинава, манифестацијата доби нов концепт. Откако култната „едносмерна„ стана шеталиште, Општината реши триесеттината штандови да ги постави овде,во срцето на градот. За посетителите локацијата е одлична, бидејќи освен угостителите, ќе ќарат и трговците
„Ова и од економски аспект е добро за градот. Шеталиштето е полно со луѓе, ќе купат нашто и од дуќаните. Многу ми се допаѓа шеталиштето и ова им е вистински погодок„ коментираат граѓаните.
Инфлацијата не успеа да ја зголеми цената или да го намали квалитетот. Познатиот штипски специјалитет чини 200денари, а составот е унифициран 200гр. тесто и 250гр. месо. Според првичните проценки само сношти „Пастрамалијадата„ ја посетиле над 25.000 граѓани. За вечерва се очекува уште поголема масовност на гости од државата и странство.
Александра Ристевска
